Baise m'encor... (Sonnet XVIII)
Sonnets (1555)
Louise LABÉ (1524-1566)

Baise m'encor, rebaise moy et baise :
Donne m'en un de tes plus savoureus,
Donne m'en un de tes plus amoureus :
Je t'en rendray quatre plus chaus que braise

Las, te pleins tu ? ça que ce mal j'apaise,
En t'en donnant dix autres doucereus.
Ainsi meslans nos baisers tant heureus
Jouissons nous l'un de I'autre à notre aise.

Lors double vie à chacun en suivra.
Chacun en soy et son ami vivra.
Permets m'Amour penser quelque folie :

Tousjours suis mal, vivant discrettement,
Et ne me puis donner contentement,
Si hors de moy ne fay quelque saillie.



Merci d'avoir consulté Baise m'encor... (Sonnet XVIII) de Louise LABÉ (1524-1566)

Baise m'encor... (Sonnet XVIII) est un extrait du livre "Sonnets (1555)" - CLE